introduire

Introduire, act. penac. Est composé de Intro diction Latine entiere, et duire Françoise aussi entiere, mais inusitée en ce sens, horsmis en composition, et signifie mener au dedans de quelque lieu, Introducere, comme, Je l'ay introduit à l'hostel, Introduxi in domum, Cic. Tuscul. 5. Il a introduit la garnison en la ville, Praesidium in oppidum introduxit, Caesar. li. 1. Bell. ciuil. Mais le François en use plus communément par translation, pour dire, mettre aucun en avant et credit, en la cognoissance, grace, amitié et faveur d'un autre. Car comme celuy qui mene au dedans de quelque lieu celuy qui estoit dehors, le met en l'interieur d'iceluy: ainsi qui met l'incognu ou non familier en la cognoissance, privauté et amitié d'aucun, semble le mettre en l'interieur du coeur d'iceluy, par laquelle mesme raison les anciens disoyent Introduire un jeune damoiseau aux armes et en la chevallerie, et lon dit à toute heure Introduire aucun aux lettres et bonnes moeurs, c. luy monstrer et enseigner l'art des armes et de chevallerie, les lettres, sciences et bonnes moeurs, par ce que celuy qui instruit aucun esdites choses, il le mene comme par la main en l'interieure cognoissance d'icelles. Dont les opuscules qui contiennent les premiers enseignemens et entrées de quelque sçavoir, sont appelez Introductions, comme, Introduction en l'art de musique, de geometrie, et semblables. Introduire aussi est mettre en avant et semer une nouvelle et inusitée opinion, ou preposition, Ce que Ciceron dit Introducere, Et au 1. De nat. deor. Et au 4. des Academiq. et de finibus, et au 3. de offic. On dit aussi Introduire, un personnage parlant en une farce, moralité, ou dialogue, pour le faire l'un des Interloquuteurs en iceluy, Interloquutorem inducere, Ce qui sembleroit estre dit contrariamment à l'energie de ladite composition, par ce que les farces, moralitez et dialogues se jouënt sur eschaffauts et à la veuë de tous, mais qui est introduit parleur en tels actes, il est fait du corps et compagnie des jouëurs, qui est le seul respect pourquoy on le dit estre introduit, voyez Introduction.

Thresor de la langue françoyse. Jean Nicot.